1.mi-sín 佮 má-tsih 老爺

(1)

102 年閩南語朗讀文章-高中學生組

陳士彰看我這台『má-tsih』的老爺車，水啉甲差不多矣，

『ia̋n-jín』的溫度嘛加降真濟，若無趕緊出發袂使得，到高雄猶有一半路咧。

我規个頭殼攏咧想講阿娘這陣倒佇加護病房，毋知有要緊無？想到遮，就閣想著五年前，阿娘對一樓跋落地下室。彼擺佇加護病房蹛三禮拜久，對頭殼頂到兩肢跤骨，

插甲全全管。阮兄弟姊妹，逐擺若入去加護病房，就是目箍紅紅出來。這擺毋知會像頂擺按呢袂？

車那開，對面車燈射過來一條一條的光線，射對頭殼底，煞變成一條一條的醫療插管，閣若像一條一條的線，

穿過阿娘彼台『mi-sín』的針鼻仝款。

會記得讀小學四、五年的時陣，阿娘就有淡薄仔老歲仔目矣。逐擺若車衫仔，攏會叫阮二兄，先共線穿過針鼻。

因為二兄毋但聽話，也是阮所有的囡仔陣，上𠢕變工藝的，

所以阿娘較信任伊。

有時陣我嘛會要求阿娘，予我穿一擺線看覓咧，總是攏予阿娘拒絕，講：「生雞卵無，放雞屎有，小等咧針予你毀歹去，我就加食力矣！」

有一日下晡，阿娘閣叫二兄共伊穿針，了後就去灶跤煮飯。我趁這个機會，就一直共二兄姑情：「二兄！拜託咧啦！予我穿一擺看覓咧好無？」

「若去予阿娘知影，咱兩个攏會去予伊修理甲金爍爍！」講起來，二兄佇阮兄妹仔內底，算伊較無膽。

「免驚啦！袂啦！」我一直共伊姑情，精差無共跪落去。

二兄除了無膽以外，嘛是上蓋軟心的。伊予我吵甲無法度，就起來予我穿針。

我手提著線一直咇咇掣，『mi-sín』彼枝針㽎一下㽎一下，我舞甲大粒汗細粒汗，線猶閣是穿袂過。

「你的正跤愛共跤踏仔小咧，彼枝針毋才袂㽎走去。」二兄看袂得過，就共我教。照伊的話，正跤跤踏仔，有影彼枝針袂閣㽎，毋過線仝款穿袂過。

二兄講：「針鼻傷細空，你愛用喙瀾共線頭小可啖一下，毋才穿會過！」

俗語咧講：「坐轎的毋知扛轎的艱苦」，無經驗過真正毋知影困難。

(2)

2.予我上數念的彼个人

許沛琳昨昏暝我又閣夢著你矣……

佇咧夢中的你，猶原是真莊嚴，佮你在生的時陣仝款，

一點仔都無變……自從你過身了後，這是我第二擺夢著你……

我永遠都會記得頭一擺夢著你，是你過身無偌久，去嘉義共你送上山頭了後，我的心情就親像是拄著大風的海湧，無法度平靜。彼暝，我真數念你，倒佇眠床頂，反來反去，睏袂落眠。頭殼內，干焦想講你到天頂了後，敢會共我放袂記？後擺我若是想你、我若是有話想欲共你講，

按呢我欲按怎？我一个人覕佇棉襀被內底，那看你的相片人那吼，吼甲睏去。講起來，嘛是真聖，彼暝，我就夢著你矣。

佇咧夢中，是下課時間，你坐佇教室頭前，同學攏咧做家己的代誌，予你罵慣勢的我，目睭根本都毋敢相對你彼爿去。啥人知影，你雄雄共我叫去，講：「是按怎交男朋友無共老師講？」我聽了煞驚一趒，就睏袂去。精神過來，才知影原來這是一場夢，嘛因為看著你真安心，所以我真緊就閣睏去矣。

最近，我為著學業的代誌咧操煩，毋知影到底欲去考研究所抑是欲去實習做老師？我就想著佇我高中的時陣，

你三不五時攏會講，畢業了後的學姊定定攏嘛會轉來揣你講心事，無論是學業抑是愛情。彼時陣，阮攏毋相信，心內想講：「老師遮爾歹，到底有[啥人]會閣轉來揣你討論？

家己褒較袂臭臊啦。」啊毋過，到這馬我才知影，老師你講的攏是事實。高中三年，逐工攏佮你生活做伙，讀冊做伙、食飯做伙食、耍嘛耍鬥陣，我敢講：「你是全學校上認真、負責的導師，嘛是全校上關心學生的老師！」

咱學校，是一間私立中學，升學的壓力已經真大矣，

而且你佮恁翁閣攏是𤆬資優班的，閣再加上你的身體本來就無好，欲𤆬阮三冬，真正是一个真食力的工課。佇咧阮高三的時陣，有幾若擺，你攏因為身體袂堪得，煞來請假。

有當時仔，課上到一半，你就會雄雄頭楞，無法度講課，

叫阮家己看冊。自阮一年仔到三年仔，你講課自來就毋捌用『mài-khuh』；毋過彼站仔，你攏愛靠伊才有法度上課，

阮逐家攏真煩惱。

(3)

3.五月天的旅行，五月的雪

賴淳¹茹透早，一陣朋友來阮兜樓跤揤電鈴。我當好睏，聽著有人咧揤電鈴實在是真煩，較苦仔起來，毋情毋願去開門。門才開一半，恐怖的叫聲就貫過門枋，迵到我的耳空。

「啥？你猶未換衫喔！你敢袂記得今仔日欲去看五月雪矣？」一向嚨喉空上大的阿庭目睭激甲大大蕊咧喝。

「五月雪？」我雄雄想起昨暗，欲睏進前接著的「通知」。這聲，我真正完全醒矣。「歹勢啦！予我十分鐘，我隨落來！」

幾分鐘後，阮就已經佇咧前往山頂的路裡囉！

沿路，阮那騎車那唱歌，這是阮這陣朋友的特殊習慣。

雖然騎車的佮坐車的攏腰痠背疼，毋過時間佇阮〈快樂的出帆〉、〈滿山春色〉、〈四季紅〉的歌聲中真緊就過去矣。

「看著矣！看著矣！我看著五月雪囉！」車拄斡入去山路，就看著山頂有一大片開甲白白白的五月雪。因為是頭一擺看著，害我歡喜甲共形象攏抨無去矣。

阮車騎咧一直對山頂踅去，綴山路斡來斡去，總算踅到勝興車站矣。軁過一條充滿客家風情的街仔路到勝興車站，聽講勝興車站是縱貫鐵路上懸的車站，既然無法度去

玉山攻頂，攻到上懸的車站，嘛有享受著上懸的感覺！阮趕緊共車停予好，做一睏衝到車站鐵枝路邊。雖然彼工天氣真燒熱，毋過溫柔的風吹佇阮的身軀，敢若咧掖五月雪，

唱風的歡迎曲，歡迎阮來到遮，阮的心情隨就變甲真爽快！

為著欲做一个好遊客，阮誠負責任佇四界翕相；對蓋有歷史的車站、真久無火車走的鐵枝路，到烏嘛嘛的磅空，

完全無想欲共這个所在的任何一个特別的角度落勾去。除了翕相，閣有一項做遊客一定愛做的代誌就是頓紀念印仔啦！我有買一本紀念冊，佇紀念冊頂懸頓一堆大大細細的紀念印仔，感覺真滿足，了後才予彼陣趕緊欲去磅空耍的朋友搝到磅空邊去。

本來到磅空是為著欲翕相，尾仔發現佇磅空內底有囥真濟有關勝興車站的紹介牌。順紹介牌，規陣人不知不覺煞行到磅空內面。阮毋知影佗位來的戇膽，決定繼續欲往內底行入去。行啊行，磅空愈來愈深，愈來愈暗，阮敢若予人吸入去宇宙的烏洞，看袂著底。

¹淳(sûn)

(4)

4.永遠的陳溝溪

林義和咱若駛車行鹿港迵南投這條台76號東西向快速道路，

來到埔鹽段，佇南北兩爿大路的中央，有一條成百米的大溝，在地人共伊叫做「陳溝溪」。

若問講陳溝溪佇佗位，相信大部分的人攏毋知；就算講提上新的地圖來反，嘛揣無。陳溝溪對外埠頭的人來講，

是一个真生份的名。毋過，若佇彰化縣的東福興佮秀水鄉南爿，對這箍圍仔成十个庄頭的人來講，陳溝溪就親像是

的爸母仝款。

論真講起來陳溝溪毋是真長，伊只不過是引八堡圳的水流落來的一條溝。水頭過埔鹽埤就是員林大排，水尾行到鹿港就是福鹿溪，總長無夠一舖路。溝底離駁岸袂超過三米。早前農業社會在地人無水道水，所有的生活用水，

毋管是田欲用的，抑是人欲食的，攏愛靠陳溝溪。連熱天時仔，風颱大水嘛愛靠陳溝溪來消敨，會使講陳溝溪毋但是附近這幾个庄頭上重要的水源，嘛是袂當欠缺的排水溝。

本底彰化縣農田水利會佇陳溝溪的中段――陳溝庄，

有設一个抽水站，號做「台灣溝抽水站」。這个抽水站佇 1949年12月22開工，隔轉年5月30完成。自本有四台五十

馬柴油『ia̋n-jín』的抽水機，1987年3月才閣全部換新。佇抽水站猶未運轉進前，遮附近的田佮人攏是靠天咧過日，

無雨水的時陣，田底必痕，無法度種作。鼓井斷滴，無水通食，著愛等到雨水期，田才有水通用，鼓井嘛才有水通食。彼當時的生活，絕對毋是這馬的少年人有法度體會的。

一直到抽水站起好了後，在地人才毋免過彼種看天生活的日子。干焦予這个抽水站致蔭的這成十个庄頭，面積就超過七百甲。這箍圍仔的農產品，包括米、番薯佮荷蘭豆攏是全國上主要的生產地。

佇台灣溝抽水站，除了有四台主要的抽水機以外，猶閣有一棟機房佮一棟宿舍。外口有一窟水池仔，四箍輾轉有種真濟樹仔佮花，光景實在真媠。溪水清清清，魚、蝦、

蜊仔有夠濟閣看現現。雙爿的草仔、樹仔青翠青翠。抽水站前有一个閘水壩，平常時仔壩底水沖跤，上深的所在才兩、三尺爾爾，是囡仔上愛落去耍的好所在。

(5)

5.甘願做牛

蘇世雄後生毋敢閣講傷濟，伊越頭看阿母，期待阿母會當做主，招阿爸留踮臺北蹛幾日仔，通予做序細的人小可款待一下。阿爸從到今，逐遍來臺北攏是一日往回，毋捌咧過暝。頭起先，逐家攏掠準伊是蹛電梯公寓袂慣勢，

到這馬才知影原來伊是咧煩惱彼隻牛無人顧。

後生知影老爸無別項掛慮，干焦數念彼隻水牛，姑不將來順從，隨時款款咧就載兩个老的轉去草地。

水源仔轉來到厝，第一項代誌有影就是去厝後的牛牢看牛。草猶閣足濟，水嘛猶賰半桶較加，根本就無啥物問題；毋過，無看著總是袂放心。

雖然水田已經休耕、放咧拋荒，水源仔照常逐日攏會牽牛去巡田園；早暗兩擺，像較早作大穡的時陣仝款。其實，伊這馬會當做的工課干焦賰三不五時共田裡的雜草薅薅咧爾爾，若無恐驚會覕鳥鼠。有時伊會加減種一寡番麥抑是高粱，彼攏足輕鬆。其實這馬農村早就已經全面機械化矣啦，加上真濟工課攏有專門的人貿咧做，根本都攏毋免用著牛矣。

這幾年，庄頭庄尾已經揣無人咧飼牛，干焦水源仔一

直猶閣共牛留咧。人若看著伊共牛牽咧四界賴賴趖，攏會勸伊緊共牛賣賣咧，毋通繼續做牛奴才。伊攏笑咧笑咧，

照常逐日牽牛巡田，管待伊田園已經拋荒偌久。

有一个親情欲佇基隆辦喜事，親身送帖仔來予水源仔。聽著伊為著彼隻水牛無人顧，毋敢出門，這个親情真袂諒解，強強欲變面。講到尾仔無法度，這个親情想著一个辦法……

「無，按呢啦……我倩一台『thoo-lah-khuh』，予你彼隻寶貝水牛坐，逐家做伙來去予我請，按呢你毋就安心矣？」

眾人笑甲強欲跋跋倒，水源仔嘛綴人一直硞硞笑。

水源仔笑笑咧，雄雄想著一个問題：「是講……恁基隆附近，敢有草通割？」伊足正經咧問。

逐家攏笑甲流目屎，干焦這个親情笑袂出來。

到喜事彼日，有影干焦某代表去基隆[予人]請，水源仔本人並無出席。

(6)

6.我佮阮阿爸

蔡幸紋自從看著杜正勝先生彼篇〈佮阿爸講上久的一遍話〉，

心肝內一直滾絞，深深受著感動。阿爸有真濟所在佮阮阿爸真相，凡勢全世界的阿爸攏生做這款，所以嘛想欲為家己的阿爸來寫一篇文章。我無想欲佮杜部長仝款，佇

「彼種場合」才來佮阿爸講話，就算偌感心的話伊嘛聽袂著矣！

阮阿爸，屏東東港人。細漢無愛讀冊，來高雄綴人學師仔。出師了後就佮阮媽媽結婚，家己出來開公司拚事業，

所以自細漢我就看阿爸佇外口走傱，佮人客盤撋。阿爸是生理人，個性閣樂暢，所以伊的朋友迵四海。

阿爸是一个通人呵咾的人，朋友有困難就算無開喙，

若有才調絕對鬥相共。阿母定定講伊家婆性，明明佮伊無底代，伊就是會家己倚過去；阮兜頭前有一个小公園仔，

逐家攏佇遐歇睏開講，厝邊頭尾逐家感情攏真好。啊若有啥代誌阮阿爸一定傱代先，像有人兜著賊偷，無人敢入去，

干焦阮阿爸頭一个提『bat-tah』衝入去；有人兜火燒厝，

伊是比消防隊躘閣較頭前去牽水管的人；公園若有老人無拄好咧冤家，伊嘛一定會做公親。阿爸就是遮爾古錐閣家

婆的人，別人的代誌定定比伊家己的代誌閣較重要。嘛因為按呢，予阮遮的做伊查某囝的真煩惱，驚伊干焦顧別人，

煞袂記得顧家己的安全。

人攏講我佮阮阿爸生做真相仝，我咧想若是種著阮阿母，無的確我會加較媠。偏偏仔我毋但面模仔種著阮阿爸，

連個性嘛佮伊足相仝，阮攏是樂暢無心機的人。阮阿爸真愛練痟話，我講話會遮爾趣味，有一半是對阿爸遐學來的。

我嘛是一个真家婆的人，代誌無共人鬥做，心肝就會礙虐礙虐。無法度！這攏是阿爸的影響啦。有一遍，佮阿爸咧開講，才發現阮對待朋友的態度真相仝：阮攏會破心肝對待朋友；人若對阮三分好，阮絕對會還人十分；欠人物件趕緊還人，顛倒別人欠咱的，家己煞歹勢共人討。我感覺佮人鬥陣就是愛用心肝，若是閣愛用頭殼來互相計較，傷忝矣！所以有啥物話就講啥物，朋友之間，會合就鬥陣，

袂合就煞煞去，我相信阮阿爸嘛是佮我仝款。

(7)

7.我佮羅馬字相拄

林瓊琳人一生的機緣實在是足奇妙的。佇三年前，我猶是一个為著考試無閒甲烏暗眩的高中生，逐工毋是英文、國文就是數學。彼个時陣總是會想講未來的大學生活會按怎過？讀的是啥物款的科系？彼當陣我的國文袂䆀，閣做三冬的「國文助教」，老師推薦我去考中國文學系。我心內想講，連阮老師都按呢共我呵咾矣，我的實力應該是袂䆀才著，自按呢我就專心準備欲來去考中文系。

結局是我無考著中文系，煞去考著台灣語文學系。頭起先，我是想講這个系應該是佮中文系差不多才著，應該嘛是讀佮國文課本內面的內容仝款的物件，所以我就決定欲去讀台文系。

佇欲讀大學的彼个歇熱，我揣著我的頭一份工課，是去超級市場內面做補貨、佇櫃台算錢的工作人員。一開始佇遐食頭路，我感覺足袂慣勢；毋過經過一段日子，我嘛愈來愈慣勢。這馬想起來，彼个時陣真正是發生真濟趣味閣值得回憶的代誌！

佇遐食頭路嘛予我體會著咱的台語實在是真重要，因為有真濟阿桑、阿媽佇遐出出入入，講的大部分攏是台語，

你若是袂曉講台語是真歹佮人接接。我會記得有一擺，有一个老阿伯仔佇咧揣雪文，揣真久攏揣無，伊就來問阮。

毋過阮攏聽無啥物物件是「雪文」，到尾仔阮才發現原來「雪文」就是茶箍，實在是真歹勢。

佇咧無閒的時陣，時間咧過真緊。我欲入大學的日子嘛接近矣，我毋但期待大學的生活，嘛會煩惱同學是毋是好鬥陣？佇欲離開厝進前的這段時間，我真正學著誠濟物件佮經驗，這馬欲離開矣，心內嘛是有淡薄仔毋甘。

入來到台文系的頭一件代誌就是學「羅馬字」，這種文字我閣是頭一擺看著的呢！講伊是英文嘛毋是英文，總講一句就是伊有伊一套規則，看起來是真奇怪，毋過煞會當共台語完全表達出來。佇過去的十幾冬內，我對台語的印象就是佮厝裡的人講的話，若是佇學校就是講華語，我所講的、所讀的嘛攏是華語，台語干焦是一種無文字的語言爾爾，想袂到佇大學內底煞來學著遮爾特別的文字。

(8)

8.油桐花，開矣未

陳文和一蕊油桐花親像咧創治仝款飄落來，先是摸著伊的肩胛頭，閣來作孽落落來，拄拄好落佇伊對褲袋仔撏出來準備欲聽的手機仔頂面。嘛毋知是因為手機的震動，抑是民興仔掀蓋的動作，白鑠鑠的、當豔的油桐花，就按呢落落來，好親像咧和微微仔風跳完最後一條哀歌仝款，倒轉去伊原本的眠床-大地。

看來，油桐嘛知，這毋是五月山林的婚禮，煞是最後的嘛是上媠的告別式，親像無偌久進前才落塗的阿爸，

親像咧哀悼阿爸佮伊較早的年代……

阿母一直佇伊的身軀邊，無聲無說，戇神戇神，恬恬仔綴民興仔行。

手機仔接起來，民興親像行轉去『時光隧道』，伊仙想都想袂到敲來的人竟然是二十幾年無聯絡的尤老師，伊又閣驚惶又閣歡喜……。

「油桐花，開矣未？」

阿爸的後事無閒煞了後，民興定定一个人坐佇山坡頂，一坐就是規下晡；目睭內干焦有滿山的油桐，頭殼內是一片空白，心肝頭就算講有挐氅氅的煩惱，總是按怎都

捎無總。

阿母知影伊心煩，就無去攪吵伊，嘛一个人坐佇伊尻川後的大埕邊，一欉大欉樟仔樹跤，遠遠共伊看。

一對母仔囝就按呢犀牛照角，相對相，恬恬無講話。

有時陣，民興的牽手昭枝仔會出來招呼一下，捀一杯茶予啉，兩个才起來行行咧，看一下，互相笑一下，

問幾句仔閒仔話，閣再坐倒轉去。

毋過，嘛是著面對現實，該來的總是閃袂開，問題毋是放咧就會自動消失。就佇民興準備欲轉去臺北上班的下晡，阿母煞尾猶是先開喙矣。

「阿興，你放心轉去上班，厝裡的代誌你免操煩。」

阿母雖然共話講甲足輕鬆，毋過民興按怎會當無管，

按怎會當放心，總是伊喙內的「厝」，對阿爸走了後，就賰伊孤孤單單一个人爾爾。

民興越頭走揣阿母的聲，干焦看著伊的頭毛攏白蔥蔥矣，親像油桐花，又閣全無彼款青春的模樣。手底咧弄一粒油桐果，焦焦扁扁，親像阿母的面，規个勼做一丸，直的、橫的皺痕，是歲月雕刻出來的。皺痕愈深，風霜愈厚；

皺痕愈濟，滄桑愈濟。

(9)

9.少年戇膽——記林田山林場的高山鐵路

Kurt Tan

真濟人攏知影咱台灣阿里山的鐵路是世界三大出名的懸山鐵路之一，毋過可能無啥人知影，佇台灣東部的花蓮縣鳳林鎮的山頂，以早嘛有一个懸山鐵路，彼就是林田山林場的運材鐵路。

1964 年，彼當陣我當少年。大學出業做兵退伍，佇臺南佳里的一間農校教一冬冊了後，想講家己讀的是林科，

猶閣毋捌體驗山場的工課，想欲親身去體驗一站仔，才閣倒轉來教冊，就請教授介紹，家己一个人，走去後山的林田山林場食頭路。

當時的林場，已經改屬佇台灣省政府的中興紙業公司，阮的工課就是監督山場的剉柴、集柴佮運柴的作業，

工作場所是佇咧海拔差不多兩千六百公尺的懸山面頂。山頂剉落來的柴，經過裁剪佮集中了後，利用鐵路佮流籠的設備，共木材運落來山跤的looh-bah。彼陣的流籠有五段，

每一段攏是直的，差不多攏會超過 1,000 公尺長，懸度精差一、兩百公尺。山頂的鐵枝路有三段，順山勢彎來斡去。

總長度欲倚 60 公里。

山頂所運落來的柴差不多攏有兩、三噸重，流籠的運

柴攏是靠柴本身的重量，對hat-sóo-tián 縋到

tsiok-kuh-tián，仝時陣共下面的空台車抑是坐人的車箱運起去流籠頭，安全的問題全愛靠面頂控制室的bu-le-kih 佮 uái 仔索。萬一若有意外，就會規組害了了。有一擺佇咧過年前，佇池南木瓜山的流籠就捌因為 uái 仔索斷去，規台柴車佮坐佇頂懸的 17 个人，挵甲碎糊糊，全部攏報銷去。

若講著鐵枝路的運材，上崎就愛靠蹦蹦仔車來拖空車佮坐人的台車；落崎拖柴車的時，是靠柴車的重量佮車擋仔的控制。工作人員落山的時，會使坐一款有椅仔通坐的台車，坐的人家己控制速度莫行傷緊，著愛靠有經驗的老鳥來操作。若是車擋仔故障、抑是速度失控，就會跋落崁仔跤，無死嘛賰無半條命。上驚的是落大雨抑是地動了後，

鐵枝路的地基有時會走精去，抑是巡邏人員巡無齊著，按呢代誌就大條矣，這款意外的代誌，定定攏會發生。

彼當陣，一個月至少攏會上、落山一擺，一年二十幾擺，五年就有規百擺。這當陣懸山的伐木已經全部禁止矣，

生態環境袂閣受破壞矣，當時彼款的危險嘛無矣。毋過想起彼當時，家已少年戇膽，毋知通驚，這陣想起來，有影心頭猶閣膽膽。

(10)

10.姑疼孫，仝字姓

陳素年

古早人講:「姑疼孫，是骨肉親；姨疼孫，親像母親。」

這句話的頂半段是講阿姑佮姪仔仝姓，因為血脈相連的緣故，致使大部分做人阿姑的，為著欲答謝爸母恩，攏會惜花連盆，閣較疼惜兄哥抑是小弟的囝兒。對外家的關心，絕對袂因為家己已經嫁出去就來減少，也就是按呢，

姑疼孫，彼是對仝一款血脈延續落來的親情。

我的同事秀秀，外家佇彰化縣芬園鄉，佇學校，我和伊是一粒一的好朋友，秀秀是一位傳統保守、性情溫純的古意人。雖然伊的爸母捌共伊講過:「後生得田園，查某囝得嫁粧，你後擺毋通轉來佮兄弟分…」遮的話，秀秀毋但無見怪，伊嘛無怨嘆。自從結婚了後，便若和伊講著後頭厝的事事項項，伊猶原會浮起一份幸福佮歡喜的表情。

阿仁是伊後頭厝的大孫，為著欲提升這个姪仔的智識，秀秀佇伊讀國小五年的時陣，對庄跤共伊轉來北部服務的學校。伊用心栽培阿仁，共阿仁注入活水、揣著自信。

佇心肝底，伊是偌爾期待這个姪仔未來的人生會當變彩色的，伊將看顧後頭厝彼份深深的感情，換做對阿仁的疼惜佮關懷。

日子咧過誠緊，阿仁今年愛做兵矣，落部隊的時，真拄仔好，伊抽籤分佇基隆。便若放假，阿仁就會轉來阿姑兜，因為阿姑煮的飯菜，予伊揣著厝裡的彼份感覺；阿姑的疼惜，會當穩定伊少年不安的情緒。收假的暗暝，秀秀攏會陪阿仁到車牌仔跤等車，這个時陣，伊一定會用溫暖的笑容問伊:「仁仔，你猶有所費無？」阿姑周至的心思，

親切的聲調，予伊的內心浮起一陣一陣深深的感動！

車來矣，阿仁徛踮車內，阿姑親像慈母的形影，予伊的心肝頭燒烙燒烙，伊慢慢仔向窗仔外的阿姑擛手，阿姑毋甘的眼神，親像咧共伊講: 「有歇睏愛閣轉來喔！」車牌跤的秀秀那擛手那頕頭，心肝底，伊向望外家這條割袂斷的血脈，會當代代生湠，一代一代傳承落去。