第三章 義愛公信仰 ê 當代神蹟
第一節 義愛公守護信徒 ê 身心健康
一、消災解厄
宗教起緣佇人類初民對未知自然力量 ê 敬畏，以及對無法度預知未來 ê 恐 懼，因此創造了力量比人類家己較懸 ê 神祇，藉著對神祇 ê 祭祀、禱告，達到消 災解厄 ê 效果。進入現代化社會，雖然理性 ê 科學知識予人類擁有解釋、支配一 切事物 ê 自信，毋過真實人生所面臨 ê 一寡不如意，未必是理性化 ê 科學技術會 當幫忙解決，宗教 ê 神秘力量就彌補這方面 ê 需求。「義愛公」信仰親像其他民 間信仰，上基本嘛是上重要 ê 功能，就是消災解厄以安定人心，像信徒 ê 工廠遭 受火災，「工場予火燒去，嘛是愛請義愛公替我改運」（詹榮金，2018 年 12 月 8 日），抑是另外一位信徒因車禍致使跤骨著傷，身體 ê 傷當然是由醫生館 ê 醫生 共伊做專業 ê 治療，毋過對著發生交通意外，心內難免感覺衰䆀運氣不好，因此
「出車禍跤斷去嘛是愛義愛公替我改運」、「較濟攏是運途䆀來改運」（許景喨，
2018 年 12 月 8 日），攏是祈求「義愛公」會當予信徒生活趨吉避凶，藉由一套 簡單 ê 科儀，「義愛公」開符令，點三欉香，用手轎仔改，頭前捋（lua̍h）三下，
後壁捋（lua̍h）三下」（許景喨，2018 年 12 月 8 日），透過儀式，「義愛公」ê 神 聖權威性會當具象化，進一步予人獲得安定感，達到穩定人心 ê 功效。
閣有，若拄著現代科學技術無法度克服 ê 問題，通常嘛會走揣（tshuē）宗教 ê 神秘力量解決，親像：
就阮彼囡仔細漢，抑攏無閒攏去上班，抑囡仔放咧，毋知是驚著抑是 按怎，攏烏白講，攏講魔鬼按呢，抑 姊夫仔，阮攏綴（tuè） 姊夫仔去 工場咧上班啦，抑伊佇遮，講抑無請去阮兜問，我是想講抑無好啦，問看 覓。（林小姐，2018 年 12 月 8 日）
35
林小姐少年時陣因為是職業婦女，做工課上班無時間照顧囡仔（三、四歲左右）， 無奈只干焦會當放囡仔一個人佇厝裡，毋知是囡仔無伴無安全感，抑是囡仔佮其 他 ê 囡仔伴咧耍 ê 時去驚到，竟然開始出現「攏烏白講，攏講魔鬼」這種著驚狀 態，一開始林小姐並毋是無揣（tshuē）正規醫療，「阿就𤆬（tshuā）欲予人看，
阿就攏無按怎啊，干焦攏講有魔鬼按呢」，顯然林小姐並毋是烏白迷信 ê 人，毋 過醫學 ê 知識佮技術紲（suà）無法度改善囡仔 ê 狀況，後來才透過親友介紹，轉 向「義愛公」祈求神力，「義愛公共收轉來」，囡仔 ê 狀況總算恢復正常。功能予 事主解除危機、獲得安定。
這个案例無定著間接突顯出傳統宗教 ê 神祕性佮巫術性，信徒對庸俗性 ê 神 蹟需求，學者捌憂慮按呢 ê 取向是毋是會「導致社會功利主義與現實主義的變本 加厲，以及投機取巧、不勞而獲心態的無所不在」73，佇林小姐 ê 個案中，卻會 當看著信徒佮神明之間「下願／還願」ê 契約，並毋是干焦供需模式 ê 利益關係：
我共下願，你若欲進香我隨香三年按呢。
這馬三、四十年矣，欲四十年矣。（林小姐，2018 年 12 月 8 日）
林小姐原本下願 ê 條件是三年，毋過最後其實是參加欲四十年 ê 進香活動，可見 雖然推動宗教信仰 ê「靈驗性」是袂使欠缺 ê，但是人佮神之間情感 ê 長期連結，
並毋是貪婪 ê「靈驗」追求爾爾，人佮神連結所帶來 ê 安定感、幸福感才是宗教 信仰 ê 要素。
73 李亦園，〈文化素養指標的再探討〉，《民國七十九年度中華民國文化發展之評估與展望》（台 北：文化建設委員會，1991），頁 21。
36
二、開藥治病
筆者 2017 年 2 月 26 日訪問朴子天旨堂，現任堂主李銘欽講著，伊 ê 老爸李 托生 20 歲 ê 時陣，佇路裡看到一尾大蟒蛇，驚一下魂飛魄散，就按呢破病：
伊去共人做烏山頭水庫，毋知是內庫抑是外庫？抑講去共人動到龍脈，
阮老爸就按呢去予土龍驚著，看著一尾蛇（liu）成大尾喔!橫佇路裡，就按 呢楞（gông）去，抑尾矣就 tsinn 寒 tsinn 熱矣，了後就按呢走轉去寮仔，
遐有請一个查--a 囡仔咧煮，山裡人咧煮飯，哼!看『小李』就有來，欲共 叫起來食飯，佇遐抑 phi̍h-phi̍h- tshuah，這馬講按呢咧發燒，就按呢去提 彼菜瓜藤水予退火講袂退，這馬落去（lue̋i）用牛車，請牛車就按呢共載 轉來，載轉來，攏袂睏得。（李銘欽，2017 年 2 月 26 日）
經過幾若個月攏袂好，尾矣想著副瀨富安宮 ê「義愛公」，騎跤踏車去副瀨求「義 愛公」，「義愛公」有答應，伊就用紅布巾仔共「義愛公」偝（phāinn）佇尻脊骿
（kha-tsiah-phiann），轉去厝裡扶鑾開藥方，起初有較好，毋過無幾工病情開始惡 化，閣再一擺求「義愛公」，「義愛公」扶鑾講毋免煩惱，十五彼工會有貴人出現。
有一工伊佇店裡拄好有一个人客來買布袋，看到伊按呢就開藥方予伊，伊就照彼 藥方去 thiah 藥仔轉來食，想袂到真正就按呢好去，這是第一擺救李托生74。 「義愛公」第二擺救李托生，是佇伊七十幾歲 ê 時陣，當時伊放尿有血，經 過嘉義聖馬爾定病院檢査講是膀胱癌，膀胱愛手術，阮想講攏已經七十外歲矣，
不需要閣去動這種手術，膀胱切掉愛揹（phāinn）一个尿袋仔，嘛是真辛苦。所 以就觀厝裡 ê「義愛公」，（朴子西園美術店周啟元雕 ê）「義愛公」起來了後，開 符仔閣有一寡藥草仔，真緊就共李托生醫好矣，閣去病院檢查已經揣無癌細胞，
74 參見「附錄三：2017 朴子天旨堂田野訪談逐字稿」。
37
最後活到九十三歲，毋是因為癌症過身 ê，是自然往生 ê，「義愛公」救伊兩擺，
所以阮對「義愛公」是百分之百相信75。
森川巡查在生重要 ê 仁義精神大多數表現佇對「疾病」ê 救助，早年為著減 少瘧疾（ma-la-li-a）、鼠疫、霍亂（khoo-le-la）等流行病所發起 ê 環境衛生改善 活動，深植副瀨庄民心中，日後 ê 託夢嘛佮提醒流行病按怎避免有關，甚至佇志 村秋翠 1937 年 ê《明治の吳鳳》兒童讀物中所虛構 ê 森川巡查 ê 死亡，抑是描述 森川巡佐因為欲救助罹患肺鼠疫病 ê 患者，奮不顧身攬著患者脫離險境，致使家 己予人穢（uè）著鼠疫身亡，因此，「義愛公」佇當代所展現 ê 治療疾病神蹟，
實在是佮日治時期森川巡查體察殖民地衛生環境惡劣，以及人民身體健康 ê 仁 心，遙遙呼應。
「義愛公」治病 ê 形象符合在生 ê 義舉善行，一方面會使看作社會建構 ê 集 體記持（kì-tî）展現，佇筆者訪談 ê 對象內面，大部分 ê 信徒攏加減知影「廟裡 有印一本義愛公傳，內面寫真清楚」（許景喨，2018 年 12 月 8 日），森川 ê 事蹟，
佇信仰「義愛公」ê 信徒心中就形成一个佮消除疫病息息相關 ê「文化記持（kì-tî）」，鞏固「義愛公」「治病」ê 神聖性，嘛正當化「義愛公」「開藥方」ê 合理性；
此外，「義愛公」治病 ê 形象，另外一方面嘛呼應「日本王爺」這个稱呼，佇臺 灣 ê 王爺信仰內面，王爺是治病之神76，對信仰 ê 角度而論，王爺「驅邪治病最 有靈驗」77。
臺灣四面環海又閣佇熱帶 ê 地理環境，佇早期公共衛生條件較䆀（bái） ê 時 代，疫病橫行免講嘛知，對著人民為欲避免傳染疾病來祈求宗教信仰 ê 保庇，應 該予伊同情式 ê 理解，信仰是人身心脆弱時陣 ê 精神寄託；佇現在當代，訪談對 象李銘欽咧講伊 ê 老爸李托生 ê 癌症治癒 ê 神蹟 ê 時陣，尤其是這種連現代醫學 都感覺棘手 ê 重大生理疾病，對著宗教神蹟 ê 治癒經驗，李銘欽顯然若欲講閣若
75 參見「附錄三：2017 朴子天旨堂田野訪談逐字稿」。
76 戴月芳，《台灣的城隍爺、王爺信仰》（臺中：莎士比亞文化事業股份有限公司，2008 年），
頁 32-33。
77 劉建仁，〈王爺公考釋〉，《台灣風物》18 卷 1 期，1968，頁 74。
38
毋講，就愛確認互相 ê 信仰態度了後，才願意交換秘密：
李銘欽：「恁敢會相信無形 ê？恁會相信無？」
筆者：「無形 ê，信啊。」
李銘欽：「好，信，無我才共你講。」（李銘欽，2017 年 2 月 26 日）
其實思考疾病佮信仰 ê 關係 ê 時陣，醫學佮宗教本來毋是對立 ê，病人知影病情 以後欲採取 ê 治療方式攏是病人 ê 自主選擇權，多元社會應該共伊尊重，畢竟每 一个人 ê 人生規劃佮重點有無仝款 ê 先後順序，未必然一定要佇醫學權威佮神聖 權威兩个之間選爿徛（khiā），對治癒神蹟 ê「欲言又止」顯示出「選爿徛（khiā）」
ê 焦慮，正規醫療袂使荒廢，信仰力量嘛無需要予人汙名，就親像受訪者所講「若 欲共信咱就莫共迷」（蕭海清，2018 年 12 月 8 日），才是健康 ê 心態。
三、護佑生命
筆者 2016 年 6 月 28 日佇北巡聖安宮訪問蔡美齡小姐，伊講拜「義愛公」伊 是上有感受 ê，民國 88 年左右，伊 ê 後生去紐西蘭遊學 ê 時出車禍：
若講著義愛公我是上有感受 ê，民國 88（1999）年左右，阮後生去紐 西蘭讀冊 ê 時陣出車禍，攏無講，厝裡 ê 人攏總毋知影。阮囝轉來彼年厝 裡拄仔好跋著爐主，「義愛公」ê 神尊就服侍佇厝裡 ê 神桌頂，我無共「義 愛公」ê 神袍穿足絚，想講阮囝已經平安轉來矣，就𤆬伊起去樓頂拜拜，
阮囝看著義愛公神袍內面 ê 鈕仔，講伊暈去 ê 時陣，就是穿這種衫 ê 人共 伊牽起來伊才精神 ê。（蔡美齡，2016 年 6 月 28 日）
這種經驗予咱聯想起來，森川巡查對著照護傷病者 ê 關愛之心，親像是《明治の
39
吳鳳》內底所描寫 ê 故事情節，森川巡查協助蒼經君倒佇病床 ê 老爸去就醫，抑 是對抾蚵仔受傷被困佇海邊 ê 囡仔義無反顧共伊救，佇當代 ê 信徒所經歷 ê，便 是「義愛公」出自悲憫信徒 ê 生命安危所顯現 ê 神蹟。